政情：明哥獲頒嶺大院士銜 冀培養年輕人正能量
嶺南大學尋日頒授榮譽院士銜予五位傑出人士，包括喺深水埗派愛心飯盒而廣為人知嘅陳灼明（明哥）。明哥直言好開心，因為佢冇讀完中學，今次係第一次獲得大學頒授榮譽銜頭，覺得好榮幸。
明哥話起初唔知榮譽院士係乜東東，後來學校老師話畀佢知，想攞到呢個榮銜要經過好嚴謹嘅審批程序，同埋對社會要有好崇高嘅貢獻，所以明哥覺得好難得。
佢又希望帶更多年輕人參與佢嘅義工活動，培養年輕人嘅正能量，事關要用個心幫助社會，先可以成為真正嘅社會棟樑。目前九大院校都好積極同佢聯絡，希望學生可以參與派飯或做義工，不過由於社會各界反應太熱烈，想做義工都要排到十一、十二月份嘞！
除咗明哥之外，獲頒榮銜嘅仲有綽號「牛丸」、有「亞洲足協年度最佳女教練」美譽嘅陳婉婷、永隆銀行第三代後人伍尚敦、東華三院前總理何世堯同埋資深銀行家袁光銘。