新一屆政府首份施政報告聽日出爐，同往時一樣，特首又係口口聲聲話解決房屋問題係重中之重，施政報告有冇料到，「好打得」係咪浪得虛名，好快就見真章。
施政報告有冇料到，仲要睇過至知，但住屋難問題已經去到「殺人不見血」嘅地步，卻係珍珠都冇咁真。有團體訪問超過四百名租住寮屋、村屋以及私人樓宇嘅基層人士，了解佢哋嘅情緒狀況，結果發現大部分受訪者人均居住面積遠低於公屋擠迫戶標準，當中有一半人出現抑鬱症以及焦慮症傾向，而租金佔收入比例愈高，愈容易出現焦慮情緒。係人都知，抑鬱症同焦慮症等精神困擾，嚴重起上嚟分分鐘有殺人及自毀傾向，話香港地「蝸居殺人」，絕對唔係危言聳聽！
外國早有研究發現，居住環境對心理健康有重大影響，英國皇家建築師學會早前警告，新建公營房屋平均面積愈起愈細，新樓房間面積只有舊樓廁所咁大，長此下去會損害居民健康同生活質素。講到咁嚴重，以為英國人住屋幾「逼仄」喇，原來當地一個三人家庭，人均居住面積有二百七十平方呎，比起香港劏房戶，簡直係人間天堂。
可能有人話，外國地大物博，香港寸金尺土，點可以同日而語？就用番自己標準嚟比。目前本港二十萬劏房戶嘅人均居住面積只有約六十二平方呎，仲低過一個標準獨立監倉嘅七十五平方呎。其實莫講話好人好姐，就算真係踎監，長期困喺白鴿籠都會自尋短見，美國加州監獄早幾年就因為人滿為患，囚犯自殺率遠超全國水平，搞到要提前放人；反觀香港劏房戶，處境仲慘過踎監，長此下去可能要學南亞兵團博坐監「改善生活」。
查實唔使講到抑鬱、自殺咁誇張，睇吓報紙社會新聞版，耐唔時就有籠屋、劏房住戶因為噪音、爭用廁所廚房大打出手，甚至白刀子進紅刀子出，不知造就幾多人間悲劇。講到呢度就真係諷刺，房屋官僚開出嘅其中一條重要藥方，居然係同民間合辦「良心劏房」。冇錯，社會善心人士同組織一人走多一步，的確其志可嘉，但唔理點樣包裝，劏房始終係劏房，作為全球最富裕社會，市民居住條件唔應該倒退到「七十二家房客」式嘅同屋共主，更加唔應該滿足於「總好過瞓街」嘅低標準。
當然喇，房屋問題積重難返，「良心劏房」又好，貨櫃組合屋都好，其實都係杯水車薪，講到治本之道，始終都係大量拓土及增加房屋供應，否則嘅話，幾多口號同計劃都係嘥氣！