政情:被指涉收地產商捐款 譚凱邦一身蟻

荃灣區馬灣區議員譚凱邦被質疑作為環保觸覺總幹事,同發展商關係密切,涉嫌利益衝突,但譚凱邦回應指環保觸覺收任何商業機構嘅捐款都唔會接受任何條件,過往亦曾因批評個別機構而導致捐款被抽起,但仍會堅持有需要就批評。

據知,有市民去信畀多名荃灣區議員,質疑譚凱邦作為環保觸覺總幹事,多年來藉活動收取各大地產商捐款,其中一名發展商係主要捐款者,而嗰個發展商亦同譚凱邦嘅選區關係密切,指控該區嘅巴士同渡輪近日服務質素下降,而譚只喺社交網站發通告,敷衍了事,質疑譚喺身份上有利益衝突,不宜再擔任區議員,要求區議會正視問題並作跟進。

稱有錯照鬧 唔受捐款機構影響

譚凱邦回應本報查詢時,指自己冇收到呢封信,而佢喺環保觸覺係義務工作,環保觸覺收任何商業機構嘅捐款都唔會接受任何條件,過往亦曾因批評個別機構而導致捐款被抽起,但仍會堅持有需要就批評,對於馬灣嘅交通,佢一直反對該區近日嘅車船加價,亦有批評相關公司,更已相約運輸處開會。

但佢承認曾收受該發展商嘅捐款,但對方絕對唔係主要捐款者,過往佢亦曾批評呢個發展商,而環保觸覺一直以來收到嘅捐款來自三個部分,包括舉辦政府項目、公眾同商界,並無依賴單一機構捐助,而每個項目亦有公開列出捐款名單,唔會受捐款機構影響。

第一手消息請下載on.cc東網iPhone/iPad/Android/Windows Phone Apps