政情：謝偉俊自爆幫白姐姐Keep身份證

立法會尋日一個小組委員會討論修訂《選舉管理委員會條例》嘅規例，選民必須出示香港永久性居民身份證正本方獲發選票。議員李慧琼提及，唔少長者嘅身份證會交由家屬或院舍保管，認為法例實施後，長者若未能及時取回身份證，將喪失投票權利。

話太太近年記性唔好

謝偉俊指自己感同身受，又提及太太白韻琹近年記性唔太好，「佢嘅身份證經常喺我身上」，又話相信社會上有唔少類似嘅情況。白韻琹今年已七十三歲，同謝偉俊結婚超過二十年，因此謝偉俊管有太太嘅身份證亦屬合理。

政制及內地事務局副局長陳帥夫回應話政府喺新規例實施後會大力宣傳，又指未來會作出檢討。但李慧琼話長者若面對呢啲情況，只會選擇唔投票，甚至唔會講；謝偉俊亦批評政府嘅政策「唔落地」，只係方便官員做事，冇考慮過長者嘅方便性，認為政府若要收緊規例，應要小心作調整。