政情：電訊 廣播 條例諮詢邱騰華憂難產

恐泛民反對 步《版權條例》後塵

《版權（修訂）條例草案》喺上屆立法會最終「作罷」收場，呢條草案本來已經過時多年，完全追唔上國外標準，但當年因為網民有極大反對聲音，導致部分本來有望投贊成票嘅議員，都轉為唔敢支持草案，當中甚至包括建制派都呼籲政府收回，喺唔夠票通過嘅情況下，時任商務及經濟發展局局長蘇錦樑喺立法會宣布「作罷」，仲炮轟泛民為求選票不分是非黑白，叫市民要「認住呢班人，一個一個咁認住」。

但係政府換屆之後，商經局本年度其中一個重要任務，就係檢討《電訊條例》及《廣播條例》，並就此諮詢市民，呢次係由新局長邱騰華處理呢個燙手山芋喇！

兩條例分界模糊 料傾向放寬

其實，電訊同廣播之間嘅傳統分界逐漸模糊，因此，兩條條例當中嘅差異有需要整合，而相關事宜亦曾喺相關嘅事務委員會中討論，預計聽日施政報告會提出諮詢，當局亦開始接觸各黨派了解佢哋嘅睇法。根據以往喺事務委員會嘅討論，外界估計諮詢會以年計，預計檢討內容包括跨媒體擁有權、境外投資、收購合併、罰則及發牌等等，以便整合兩條條例當中有較大差異嘅地方，外界普遍認為，最終會傾向有更多放寬。

據了解，當局相信有關條例過時，而業界確實面對經營困難嘅問題，重新檢討有助業界營運，但最擔心會被較激進嘅民主派冠上「引入紅色資本」同「影響言論自由」嘅帽子，最終會變成版權條例翻版，原本支持嘅議員都會因為外界極大嘅反對聲音，而令到條例未能通過。睇嚟要避免歷史重演，當局一開始就要打好呢場輿論戰嘞！