中環出更：劉小麗被DQ 捐款照寄立會
本土派劉小麗被DQ立法會議員資格後，早前已撤出金鐘嘅立法會議員辦公室，新辦公室已經落戶旺角兼且喺尋日啟用，佢又繼續發起月捐支持新辦公室運作開支，但既然佢已經唔係議員，何解仲呼籲捐款支票郵寄返立法會大樓？
新辦公室落腳旺角
小麗尋日喺社交網站Facebook上載短片，宣布位於旺角嘅小麗辦公室正式啟用，仲話會繼續經營各項議題，包括院舍巡查計劃、「區區有墟」研究計劃及閒置土地研究，並透過延續民間論壇進行民間教育等，但講到尾都係呼籲月捐，指其辦公室現時仍然極需每月約八萬元嘅開支，用嚟營運組織及租辦公室，又指接受郵寄支票，但支票郵寄到立法會綜合大樓1018室。
既然係「劉已完」，點解仍呼籲捐款支票寄到立法會大樓？事關佢早前已成為社福界議員邵家臻嘅協作夥伴，因此支票係寄去邵家臻的議員辦公室。被DQ立法會議員資格嘅四名人士當中，除咗在囚嘅香港眾志羅冠聰外，社民連梁國雄、姚松炎同劉小麗已先後變成泛民議員嘅顧問，繼續喺立法會大樓游走。
卓妮