中環出更：阮兆輝施家殷粵劇餐廳相認
社企近年愈見盛行，尋日又多一間社企經營嘅餐廳開張，為殘疾人士提供更多工作機會，讓他們多接觸社群。粵劇名伶阮兆輝就出任開幕典禮嘅主禮嘉賓，更加同扶康會副主席施家殷（Kyran）相認添！
由扶康會成立嘅社企康融服務有限公司，喺高山劇場經營新中菜廳，當中有六成員工係弱勢社群或殘疾人士，而餐廳為咗配合高山劇場，裝潢同餐具都切合中式戲曲嘅主題，難怪會邀請阮兆輝作主禮嘉賓。
阮兆輝一見到Kyran，就話雙方識咗好多代，因為佢同Kyran爺爺係朋友，以前經常拜訪Kyran屋企。不過Kyran就話阮兆輝應該唔記得佢，事關屋企多人，而且爺爺子女眾多。
講起粵劇同飲食結合，阮兆輝話唔少名伶都會戒口養聲，尤其戒食辣嘢，但自己就無有怕唔戒口。不過，佢就話演出時有一種生果一定唔會食，但呢種生果亦有人視為開聲良品，之咪係橙囉！佢解釋，橙衣令佢覺得喉嚨有異物，即使表演未必受影響都避免進食。
陳積志大讚食物夠水準
名廚周中就出任餐廳顧問，主要為菜單獻計。佢話餐廳客人以粵劇觀眾為主，年紀唔太年輕，所以菜單會以清淡易食為主。另外，佢又話過往未曾聘用殘疾人士，雖然記性或會較差，但就勝在唔似一般員工會頂頸喇，而且可以畀機會佢哋貢獻社會添！
扶康會主席郭鍵勳同民政事務局副局長陳積志都有出席活動，其中陳積志就大讚餐廳食物夠水準，即使啱啱食完午飯，仍然畀餐廳嘅美食吸引，更大讚餐廳夠意思。
卓妮