議會拉布誤蒼生 修例堵漏除禍根

立法會新會期開鑼,議員們根據傳統舉行切燒豬儀式,寓意來年順順利利。不過嘥氣喇,燒豬年年切,議會年年吵吵鬧鬧,紛紛擾擾,到頭來又係一事無成浪費公帑。最好笑嘅係,反對派連行禮如儀都要玩黨同伐異,全面杯葛,想佢哋為市民做實事,同緣木求魚冇乜分別!

第樣唔使講,淨係講財委會修改議事程序,杜絕議員拉布呢一筆,隨時又係鬧到滿城風雨,雞犬不寧。睇番今次修改規則嘅主要內容,包括將財委會同日嘅多節會議視為同一次會議,被逐議員唔可以喺同一日內再返會議室開會,仲有就係將議員表決鐘聲時嘅發言時間,由三分鐘縮短到一分鐘。如果順利通過,反對派肯定唔可以再好似以前咁,鍾意幾時拉布就幾時拉布,鍾意拉幾耐布就拉幾耐布。反對派冇咗拉布呢項重要嘅玩嘢手段,等於變相被繳械,唔氣急敗壞至奇。

反對派議員郁吓就玩拉布,癱瘓政府施政,早就搞到神憎鬼厭,特別係反對派揸住政府錢袋子,為達不可告人嘅政治目的,不惜以民生撥款相要挾,之前港府三十六億元教育撥款,喺反對派持續拉布後幾乎難產,就係最經典例子;至於目前喺財委會積壓嘅撥款,亦包括中九龍幹線工程撥款等民生項目。講開基建工程,拉布除咗令延誤、超支情況進一步惡化,工人更隨時飯碗不保,你話係咪累人累物累街坊吖。

呢嗱,財委會主席陳健波就講得啱嘞,反對派原本聲稱拉布係「核彈」,喺重大事件時先會採用,點知搞搞吓係又拉唔係又拉,卒之「核彈」變「臭彈」,堵塞漏洞,相信大部分市民舉腳贊成。最過分嘅係,反對派政客居然惡人先告狀,指摘對家「乘人之危」,趁六名反對派議員被DQ「人多蝦人少」,強行修改議事規則,豬八戒倒打一耙,仲有冇再離譜啲吖。

冤有頭債有主,反對派要怪就怪自己班豬隊友,咁多嘢唔玩係都要喺宣誓玩嘢,自尋死路與人無尤。再講吖,反對派拉布阻住地球轉,騎劫大多數人利益,長期以來「人少蝦人多」,家陣修例阻拉布,撥亂反正,絕對合情合理。

當然喇,立法會叫得做「垃圾會」,即使政客唔拉布都唔使旨意佢哋做到咩實事。尊貴議員們質素之低,有目共睹,班友唔係遲到早退就係言不及義,再唔係就搞埋晒倒插五星旗、區旗一類小學雞「行為藝術」,又或者執住政敵一兩句說話借題發揮大搞狙擊,港計民生根本冇人關心。

最冤枉都係納稅人。高薪厚祿養班廢官已經夠氣頂,加埋呢班無良政棍,趕完一批又嚟一批,都咪話唔無奈!