政情：呂錦強參選東華區 唔認代表建制
中西區山頂選區和東華選區，因自由黨陳浩濂和民建聯蕭嘉怡加入政府而出現空缺，補選提名期喺上周二（3日）展開。東華選區戰況逐漸明朗，繼民主黨中委伍凱欣前日搶閘報名參選該區後，報稱獨立嘅新會商會學校校長呂錦強尋日亦正式參戰。
盼以身作則 改善社會撕裂
呂錦強被外界指係代表建制派參選，佢喺報名後見傳媒時否認，強調自己係獨立人士，坊間點講佢都冇辦法，佢又話社會唔應該將政治人物簡單區分為建制或泛民。呂錦強又自稱喺東華區工作十一年，對該區有感情。目前社會撕裂嚴重，佢想透過參選向學生以身作則，改善社會氣氛。
尋日有十多名身穿藍衫人士到場支持，多數來自中西區家長教師會聯會，而呂嘅選舉經理人呂柏希則係該會主席。有份助選嘅前中西區委任區議員文志華被問到係咪親建制，佢笑言凡係委任嘅都被人當建制喎，承認呂嘅支持者中唔少有政黨背景，但強調只佔少數。