政情:廖漢輝:順德人「爛食」專出名廚

早前喺一個酒會上見到香港順德聯誼總會副主席廖漢輝,佢卸任區議員之後都忙到冇時停,最近就忙於籌備成立「香港順德勒流聯誼會」。佢話順德有十個鎮,依家仍有三個未成立同鄉會,其中一個就係佢嘅鄉下勒流鎮喇!

勒流以電器聞名

廖漢輝話,依家已搵到大約二百名鄉親,預計明年初就可以成立。佢話順德每個鎮都各有特色,例如大良有崩沙、陳村有陳村粉,至於勒流就以電器聞名,近年都出咗好多名廚。點解順德美食咁出名?廖漢輝笑稱因為順德人「爛食」,先可以將啲嘢煮得好食喎。

話時話,早幾年流行將各地同鄉組織合併為總會或聯會,依家點解又要行番轉頭,成立鎮級咁細嘅同鄉會呢?廖漢輝解釋話,好似順德聯誼總會、廣東社團總會嘅會員數以千計,有份參與會董會嘅人始終有限,所以細化啲都有好處,最緊要係搵番第二代,等佢哋對家鄉有多啲感情咁話。

第一手消息請下載on.cc東網iPhone/iPad/Android/Windows Phone Apps