中環出更:傑出女企業家陳芳夢想做棟篤笑

傑出專業女性及女企業家早前舉行頒獎禮,剛出爐嘅得獎人齊齊分享自己嘅夢想。經營酒莊嘅陳芳獲頒傑出女企業家,佢話夢想係要做特首喎!其實陳芳係想講吓笑博君一粲啫,其實做棟篤笑先至係佢嘅夢想。

陳芳話,香港人整體壓力好大,感覺上大家都好攰,好有距離感。加上佢嘅校園生涯喺好嚴肅嘅修女學校度過,佢發現一旦笑開懷,人與人之間嘅距離就會拉近,所以想以棟篤笑嘅方式,令大家輕鬆吓。佢形容棟篤笑就好似做運動拉筋咁,係生活上嘅一種紓緩。

陳芳嘅構思係於酒宴中撥十五分鐘表演棟篤笑,但係要令人暢懷大笑一啲都唔簡單,笑話亦唔易寫,一啲今日覺得好笑嘅橋段,過咗一段日子可能就覺得過氣。雖然做棟篤笑面對嘅挑戰唔少,但係陳芳亦滿懷信心,因為早前佢完成撒哈拉沙漠長跑賽事。咁艱苦嘅賽事都可以應付,做棟篤笑冇理由唔得嘅。

馮雁蒙美玲工程學表現優秀

同場仲有主辦機構香港女工商及專業人員聯會會長麥黃小珍、選舉籌委會主席蔡美碧、香港聖公會福利協會總幹事李正儀,同埋獲頒傑出專業女性大獎嘅科技大學電子及計算機工程學系教授馮雁、中文大學系統工程與工程管理學系教授兼系主任蒙美玲等人。

馮雁同蒙美玲嘅專業範疇都同工程學有關。馮雁向來鍾意睇科幻電影,佢嘅研究方向係人工智能同人機對話技術,蒙美玲則鑽研電子溝通書應用程式,以幫助語言障礙嘅患者。

卓妮

第一手消息請下載on.cc東網iPhone/iPad/Android/Windows Phone Apps