清朝文學家趙翼詩云︰「江山代有才人出，各領風騷數百年」，稍稍改為「校園代有獨禍出，各自丟人數十天」，正好形容今時今日本港大專院校嘅亂象。開學冇耐之嘛，先係教大出事，再到中大出事，依家輪到嶺大學生佔領校園，你方唱罷我登場，真係睇見都眼冤。
話說身兼嶺大校董嘅立法會議員何君堯早排針對主張港獨者發表「殺無赦」論，十多名嶺大學生尋日喺未經校方批准下，喺校內天幕廣場紮營，聲稱要透過「佔領」行動促使校方踢走何君堯嘅校董職位。參與嘅學生又將寫有「促去何妖」嘅長紙條掛喺氣球上再放上天，寓意「升走何妖」。
唔講其他嘢住，先擺番正個龍門先。如果話何君堯嘅「殺無赦」言論語帶威脅，咁佢哋要「踢走」何君堯，究竟想踢對方身體邊個部位，係兜心口窩埋去定係拆祠堂，用氣球「升走」對方，一去冇回頭條命豈不是凍過水？按照佢哋嘅邏輯，寫「壯志飢餐胡虜肉」嘅岳飛，應該係變態食人狂魔；高官被要求「人頭落地」，更加應該拿拿臨報警求助。
查實講到語言暴力，「殺無赦」只係冰山一角，教大民主牆有人攞高官喪子開玩笑，喺死者家屬傷口撒鹽；啱啱宣布約滿唔撈嘅理大校長唐偉章，因為嚴令禁止校園「播獨」，被學生喺民主牆貼黑白相詛咒身亡，點解唔見有學生出嚟抗議？
冇計喇，時下部分大學生就係咁，只問立場，不講是非，呢班人自以為真理在手，正義朋友上身就可以目空一切，鍾意趕走邊個就趕走邊個，郁吓就玩佔領，仲有冇再霸道啲吖。有人就講得啱嘞，大學由納稅人出錢供養，在校學生某程度上只係「租客」，更何況家陣嘅學生會都被同學質疑「不代表我」，十幾丁友有咩認受性？
一日最衰都係佔中埋下禍根，法官口中嘅「有識之士」鼓吹「違法達義」謬論，唔少入世未深嘅年輕人被洗腦，當中唔少係大學生，明明做緊違法事，卻自以為光環加身。最弊係一眾大學校長一味鵪鶉，唔係曉之以義，反而變相縱容。好似嶺大校長鄭國漢咁，到最近仲撐校園討論港獨冇問題，後來為平息眾怒至聯署反獨；港大嗰位洋校長亦係一味不沾鍋，對校園港獨歪風不置可否；至於中大校長沈祖堯，更一度將佔中學生同「聖人」相提並論，啲學生唔鬆毛鬆翼，變本加厲至奇喇！
都係孔夫子講得啱︰「鄉愿，德之賊也。」如果話「戴妖」之流誤人子弟，大學校長淨係識得沽名釣譽討好學生，何嘗唔係香港教育嘅悲哀！