政情：腰骨彎咗 胡志偉以為肌肉痛
立法會議員胡志偉上月帶領民主黨出戰同民協嘅籃球友誼賽，睇落仍然寶刀未老，點知一個月後，佢就腰患纏身，起初仲以為只係肌肉痛添，果然再鋒利嘅刀都會有生銹嘅一日喎。
無厘頭受傷
胡志偉透露，近日開始出現腰痛，但以為只係肌肉疼痛咁小兒科，直至情況未有改善先去照X光，先發現條腰骨彎咗少少。佢就抓爆頭唔知乜嘢原因，直言平日踢波打波都唔察覺有問題，近期又無拎重嘢，所以都話今次受傷無厘頭，而現時已預約去做磁力共振，去睇實際發生乜嘢事？
好彩嘅係腰痛對佢嘅生活同工作無太大影響，行路都好自如，但就話坐低後起身好大件事，需要扶住起身，自己更要就住去郁添，醫生就警告佢咁做只會令病情惡化，難怪佢都大嘆麻煩喇！既然就住條腰又唔得，惟有食止痛藥，但佢話呢個方法治標唔治本，咁惟有希望快啲搵到病因喇！