政情：立會委員會執位 一舊雲 阿忠被飛起

食安事務委員會及人力事務委員會原本分別由一舊雲同阿忠任主席，但喺民主派同建制派商討協調下，新一個年度佢哋兩個就要交番個位出嚟喇。有指食安事務委員會主席位將由民建聯（民記）漁農界議員何俊賢頂上，人力事務委員會就由工聯會議員郭偉強做主席，而原本由金融服務界議員張華峯做主席嘅財經事務委員會，同埋由民記議員葛珮帆做主席嘅資訊科技委員會就改由民主派坐正。

建制續攬四重要委會主席

雖然建制派聲稱為咗新一個年度開局和諧，就算民主派議員人數少咗都唔霸晒委員會主席位，但佢哋對於四個重要事務委員會嘅正、副主席位仍然係寸步不讓，包括教育、司法及法律、民政同埋政制。代表民主派同建制派商討嘅資訊科技界議員莫乃光就話，建制派霸晒呢四個重要委員會正、副主席位，同民主派期望有落差，不過建制派今次開會已經講咗會考慮係咪喺本屆立法會第三、四個年度放寬呢四個委員會正、副主席位喎。

對於協調之下冇份再做食安事務委員會主席，一舊雲就話自己並冇參與民主派同建制派商討，所以對於自己冇得撈亦唔知情，至於有否覺得被犧牲，佢就話︰「我唔會咁講嘅」，但佢都承認如果可以連續做兩年就最好。至於會唔會嘗試繼續爭取做多一年主席，佢就話無謂花時間作權力鬥爭。

易志明料掌交通事務委員會

另外，民記議員陳恒鑌原本係立法會交通事務委員會主席，佢尋日就話自己新一年度將唔會做任何委員會嘅主席，交通事務委員會主席會改由航運交通界議員易志明擔任，至於副主席一職就會續由民主派議員做喇！