中環出更：航班延誤 劉燊濤呆坐8粒鐘
唔少本港商家都要四圍飛，亦會遇到有航班延誤或突然取消嘅情況。卓妮日前喺沙田馬場遇到香港表廠商會副會長劉燊濤（Gary），佢就試過喺上海虹橋機場搭夜機返港，入到候機室先至知道坐嗰班航機仲停喺香港，要等內地空管解除先可以飛去上海接佢，結果Gary要喺候機室枯坐八個鐘。
營運時間已過 機場商店全打烊
Gary話當時因為營運時間已過，機場商店已經全部打烊，佢百無聊賴但幸得航空公司提供飲食同開放WiFi，漫漫長夜先至無咁難過。不過，當佢登機返港已屆清晨時分，返到屋企稍事梳洗，又夠鐘返工嘞！佢話航班延誤本來都好唔高興，但諗到內地一旦實施空管，航班十之八九都會受阻，所以都唔嬲得咁多，都係期望高鐵將來通車，將來往返內地可以多一個交通選擇。
陳鑑光話囡囡選乘航班突取消
仁愛堂副主席陳鑑光就話囡囡剛好選乘嘅航班突然取消，滯留日本靜待航班恢復返港。佢話囡囡無病無痛，喺日本留多幾日問題唔大；但要藥物隨身嘅旅客若未能如期返港，其徬徨心情實在可想而知。佢仲話舊年同家人喺多倫多知道將有颱風襲港，為免返港行程延誤，決定付費畀航空公司改航班提前一日返港，點知颱風較預計更早打到香港導致航班取消，原來遲一日出發嘅航班則維持不變，令到佢同家人大感無奈。
轉頭見到馬主協會前會長陳湛全，佢亦話舊年年尾打算去北海道，而佢哥哥陳湛文就要由北海道返港，結果當地一場暴風雪，兩人所乘搭嘅航班同告取消。陳湛全話礙於種種原因，航班取消並非罕見，但航空公司只要及早安排，應可減少旅客嘅不便同怨言。
卓妮