政情：梁福元破傳統 男女平等踏首步
講起原居民傳統，總係帶住重男輕女嘅觀感，好似丁權、點燈、太公分豬肉等，都係男丁先能夠參與。不過，十八鄉鄉事委員會主席梁福元就透露，近日同梁姓鄉里開村民大會討論物業分配問題，將來女性都有得分喇！
村內女性都有得分租金
梁福元話村內有物業由太公發展落嚟，開會後決定一改以往只得男丁有份分租金嘅習慣，村內嘅女性都有得分，但女丁因為會外嫁出去，所以佔有嘅比例就未及男丁高。
而有權利就有義務，男女都有得分之後，日後春秋二祭同村公所使費都需要共同承擔，但男性負擔就會較多，始終分得多啲嘛！雖然男女未做到完全平等，但都算突破過往原居民重男輕女嘅風氣。