中環出更：黃冰芬 郭芙蓉學炒米粉蝦碌
有說福建女人要識炒米粉先嫁得出，仲未結婚嘅區議員郭芙蓉同黃冰芬就被質疑係咪識炒米粉，佢哋早前決定大反擊，親自搵嚟福建師傅學炒一次，點知竟然「蝦碌」。
雖然有名師指導教煮嘢，但郭芙蓉一開波就唔小心碌咗隻蝦落隻裝住豉油嘅碟度，真係名副其實「蝦碌」，大家即忍俊不禁，笑到停唔到口，場面搞笑。
跟足步驟煮到香噴噴
不過有個正宗福建菜師傅從旁指導，佢哋好快進入狀態，跟足步驟煮到香噴噴。卓妮見佢哋兩個一齊煮，但得一隻鑊，不時要交換位置，好在佢哋夠快手，過程中都冇黐底。
出名煮福建莆田菜嘅師傅方志忠就話，好多中國的地方菜都廣為港人熟悉，好似潮州有打冷；上海有小籠包；客家有梅菜扣肉等，全部都好容易喺香港食到，但偏偏市面上就係冇乜福建嘅地方菜。提到福建菜，講嚟講去大家都只諗到佛跳牆，但佛跳牆唔會成日食o架嘛！
方志忠話最愛扁肉湯
最初喺新加坡開福建餐廳嘅佢仲話，係因為有香港人喺新加坡食完之後大呻喺香港食唔到，所以佢先返嚟開咋！咁到底福建有乜嘢吸引嘅家常菜式地道又夠風味？方志忠就話自己最愛扁肉湯，而土筍凍及滷麵都係香港較少食到嘅嘢，依家已經愈嚟愈少人識整嘞！
呢日現身試食兩位女士炒米粉嘅仲有「西裝大王」、香港福建社團聯會主席吳良好同兒子吳志龍。吳良好話以前生產西裝多，開始發展出自己牌子，不過實在太辛苦一班員工，而且好多人買西裝始終都係鍾意外國牌子。吳志龍就因家族生意而學識分辨邊啲西裝質料較靚，特別注重細節位。
卓妮