政情：今日你上鏡：郭基煇搵世界級單車手撐場

第三屆單車節喺下個月八日舉行，而都係單車發燒友嘅新地執行董事郭基煇亦好着緊，仲穿針引線邀請世界級嘅單車手嚟香港參賽添！講起踩單車，佢話喺公路上面踩單車流汗追逐，感覺良好，係佢最鍾意同有益身心健康嘅減壓方法，仲話喺流汗付出嘅時候，可以幫到弱勢社群，就係雙贏情況（Win-Win），亦堅信同希望透過單車節推廣「運動行善」，又透露當旅發局接觸新地贊助單車節時，佢就堅持一定要有慈善嘅元素，要有家庭單車樂，仲要同埋弱勢社群一齊踩車添！