政情：嶺大生抗議 促禁何君堯入校園

大玩食字 諷刺執業資格風波

約四十名學生尋日喺嶺大發起遊行，大玩食字，以「執葉律師何君堯，有辱嶺南不得饒」等口號，既批評何君堯「殺無赦」論有辱嶺大，亦諷刺何君堯日前嘅執業律師資格風波。

班學生仲向校方提出四大要求，包括公開譴責何君堯；澄清何君堯嘅立場同言論與嶺大無關；校董會立即成立調查小組，徹查何君堯失德行為；同埋喺何君堯道歉前，限制何君堯進入校園。佢哋向校方遞交請願信，校方都有派人接信，本來仲想同學生代表握手，不過點知就畀學生請食檸檬。

另外，有公民記者早前向英國律師監管局（SRA）投訴何君堯發表「殺無赦」嘅言論不當，該公民記者尋日又喺社交網站上載SRA嘅回信，信中指SRA確認何從來冇喺英國及威爾斯執業，因此何喺當地屬非執業律師，而由於何係當地獲認許嘅律師，SRA可以考慮跟進有關其操守的投訴，並會喺十月十六日回覆。