政情：扭計惹不滿 為保財會副主席 田北辰提早拉票

墟市小組委員會尋日召開首次會議，而主席原本由自決派劉小麗出任，但其議員資格喺七月份被褫奪，令到主席一職有空缺，所以要進行埋補選，算係為新立法會年度來臨嚟個熱身。結果由小組副主席、公民黨嘅郭家麒自動當選，至於副主席一職則因為剩低嘅會議數目唔多而唔再需要。

成日同政府唱反調

喺上個立法年度中，泛民同建制派因談判破裂全面開戰，更要互相「冧人」落各個委員會，最終導致選主席後出現「退會潮」。有建制派都直言情況唔理想，希望同泛民開會協調有成果。

除咗同泛民協調，建制內部亦需要商討人選，其中田北辰喺上個立法年度擔任財會副主席，但佢個性非常強烈，不時變身為「建制壞孩子」，尤其退出有份創立嘅新民黨後，與政府唱反調更頻密，所以能否連任引起大家關注。

仍記得田北辰喺審議迪士尼樂園擴建撥款時，就同泛民聯手大鬧條款「喪權辱港」，為泛民提供彈藥怒轟政府，所以有建制派認為佢唔聽話，唔適宜出任重要職位，更有人透露，田北辰做事難以預測，搞到財委會主席陳健波開會時連去廁所都要諗過度過添！

建制派未有人想爭

不過，有資深建制派議員就透露，審議迪士尼樂園撥款至今已過幾個月，唔少議員已經消氣，加上建制派中亦未見其他人有意競爭，暫時田北辰仍然有頗大機會連任。據了解，田北辰亦非常着緊，佢早前已經去信畀多位建制派議員爭取支持連任，而信中更提及佢無法出席下周五選主席嘅財委會，難怪會提早拉票，慎防甩轆。

另外，建制派早前亦密謀將財會轄下嘅工務小組同人事編制小組「摺埋」以減拉布，但據悉工務小組主席盧偉國對建議有所保留，加上一切都要待財委會選完主席先能作進一步行動，所以未必能夠於短期內摺埋，故現階段毋須考慮點樣安撫兩個小組主席，例如讓出財委會副主席職位作籌碼，咁田北辰續任副主席應該穩陣啲喇！