中環出更：姚思榮趁休會日日游水強身

立法會復會在即，唔少議員已經充完電投入工作，因為立法會已經開始有會議召開，好似立法會旅遊界議員姚思榮尋日都有去開會，仲見佢精神飽滿好醒神。佢就透露，自己趁休會期間日日去游水，難怪感覺健康咗喇！

姚思榮話早喺休會無耐去咗泰國旅行，但之後日日保持游水習慣，至今維持咗兩個月，睇嚟佢現時精神爽利，勤做運動應該就係主因喇！佢仲話堅持到日日游水係深知復會後難抽時間，又形容屋企過條馬路就抵達室內泳池，所以容易抽時間去游水，即使遲吓冬天來臨都唔使怕凍添！

仲記得上年已經聽講過姚思榮有胃部不適問題，佢就話目前仍然受胃痛困擾，因為胃部機能郁得較慢，難怪佢會多做運動去強身健體喇！雖然仲未痊愈，但佢就話體重已經無再下降，胃口亦都唔差，而佢亦都無因此而放肆，現時佢每餐只係食七成飽，茶癮起亦只會飲少少試吓味，睇嚟佢已經搵到克服胃部不適嘅方法嘞！

卓妮

中環出更：姚思榮趁休會 日日游水強身