中環出更：黃傑龍擺烏龍自爆牛（月展）當牛扒
香港人工時長，成日早出晚歸，唔識煮嘢食或者叫外傭姐姐幫手煮已成常態。早前網上就有單外傭蒸熟咗啲冰皮月餅嘅爆笑事件，卓妮早幾日見到稻苗學會會長黃傑龍（Simon），佢就自爆以前都試過擺烏龍，煎咗件牛扒之後發現韌到咬唔到，打畀阿媽問先知道原來嗰塊唔係牛扒嚟！
以為做飲食業嘅一定係天生廚神？Simon就笑言自己下廚都有唔少黑歷史，記得當年去澳洲留學，焗住自己煮飯，媽咪幫佢買定咗幾日餸，之後就擺低佢返香港，佢第一日親自下廚嘅時候，見雪櫃有塊牛扒就諗住拎出嚟煎，點知煎完一擺落口韌到乜咁，即刻打電話同阿媽投訴塊牛扒唔靚，阿媽隨即笑爆嘴話嗰塊係用嚟煲湯嘅牛（月展）而唔係牛扒，唔怪得啦，所以唔係乜嘢部位都適合煎o架！
潘權輝話忌用暖水浸海參
呢日稻苗學會舉辦十四周年會慶晚會，一大班飲食界翹楚現身，講起最難煮嘅食材不得不提海味，從事海味生意嘅潘權輝話好多海味都要經過複雜嘅程序先煮得好食，好似鮑魚海參咁，有啲人買到返屋企會束手無策，試過有客人買咗好靚嘅海參返去浸完有陣臭味，好可能係因為用咗暖水浸所致。佢話其實冷熱水都得，但最棹忌係用咗不冷不熱嘅水，尤其天熱時水喉一開出嚟嘅水係暖嘅，咁就好容易會發臭喇！
轉頭見到稻苗學會主席邱金榮、執委陳岳成，做食肆生意嘅陳家強同陳德鍵。邱金榮話佢公司樓下做清潔劑嘅廠早前打算結業，佢覺得好可惜兼希望香港製造嘅品牌可以延續落去，所以收購咗並計劃轉型打入家用市場，以女性客戶為主，認為洗潔精都可以好似化妝品咁，護膚又有唔同香味。
卓妮