政情：阿婆整濕紙皮賣 梁美芬問點解
多次提倡治理鼠患而獲得「鼠王芬」外號嘅立法會議員梁美芬，今午於深水埗保安道市政大廈附近對出嘅順寧道一帶視察衞生情況，期間遇到一名婆婆正整理緊收集得來嘅紙皮，就問對方：「做乜要整濕啲紙皮嘅？」回收紙皮係按重量計算，唔少收拾紙皮嘅長者都會稍微弄濕紙皮，增加重量賺多一啲，雖然做法取巧，但係大多隻眼開隻眼閉。之不過，梁美芬似乎唔太清楚呢條「潛規則」，搞到要身旁嘅人打圓場，話「濕咗水都賣到o架」。
鬧食署處理鼠患「十年如一日」
梁美芬一行人尋日巡視嘅後巷未見積水，雜物亦無霸佔馬路，衞生情況睇起嚟唔差，但梁美芬就忍不住踢爆係部門「洗太平地」去粉飾太平。佢又話順寧道非法棄置垃圾問題嚴重，後巷同馬路都係重災區，而垃圾會吸引老鼠同雀鳥，造成鼠患同野鳥問題。講起鼠患，佢又勞氣咁話食環署處理方式十年如一日，佢多年嚟建議引入海外鼠患專家，但當局一直無跟進。
陪同梁美芬一齊落區巡視嘅李鄭屋邨社區主任周潔莹，原來仍然係一名學生，現時就讀理大副學士。未畢業就出任社區主任，莫非已一早「吼」住下屆嘅區議會選舉，提早為選戰做準備？