政情:馬灣建組合屋肥尹火併譚凱邦

香港人長期面對住屋問題,政府多年來苦無對策,唔同政黨同民間團體提出嘅建議隨時變爭議。繼早前有學者提出填船灣淡水湖作建屋用,引起關注之後,民主黨(白鴿黨)立法會議員尹兆堅(肥尹)日前又建議喺馬灣建組合屋。不過,屬馬灣選區嘅荃灣區議員、新民主同盟譚凱邦(Roy)就公開批評肥尹嘅建議係「唔經大腦」嘅「劣質建議」,仲話馬灣有爭議嘅議題要問過佢先。肥尹亦都不甘示弱反擊,暗寸阿Roy惡過地產商。

肥尹日前召開記者會,公布白鴿黨有關興建組合屋嘅研究結果。肥尹話依家有九百多幅閒置官地,因毋須改變規劃,可率先用作建組合屋,佢又提到當中包括一幅位於馬灣嘅八公頃平地可建三層高嘅貨櫃屋,提供近八千伙單位。

譚仲話有關議題都要問過佢先

作為馬灣區議員嘅阿Roy隨即喺社交網站公開批評肥尹,話肥尹嘅建議係唔經大腦嘅劣質建議,冇做好資料搜集,思慮不周。阿Roy又話政府已計劃將該幅土地用作興建私樓,當區居民開會時已反對,擔心令當區交通難以負荷,而馬灣交通配套不足,亦會令貨櫃屋嘅基層居民難以負擔交通費,加上香港經常打風,呢個都係貨櫃屋最大問題,佢仲叫任何泛民同本土派如果有關於馬灣嘅具爭議性議題要問過佢先,咪自把自為喎,認真巴閉。

畀阿Roy係咁狂砌,肥尹亦喺個人社交網站反駁,話佢建議興建嘅係「預製式箱形組合屋」,材料、外觀同配置都優勝過其他臨時過渡性房屋,叫阿Roy先掌握組合屋嘅資料,唔好用颱風嚟嚇居民,而組合屋嘅建議可以只係建十八至三十個單位,即係只住幾十人,反叫阿Roy搞清事實,唔好製造謬誤同唔理性嘅討論。肥尹仲話一早預咗個建議會畀地產商嘈,但估唔到有人仲快,暗寸阿Roy仲惡過地產商。

阿Roy本來喺舊年參加立法會選舉,同參選新界西嘅肥尹係對手,但阿Roy後來因太太患病而退選。依家距離下屆立法會換屆選舉仲有三年,唔通佢哋提早開戰?

第一手消息請下載on.cc東網iPhone/iPad/Android/Windows Phone Apps