未入正題之前，功夫茶想講吓一單科技新聞。話說舊年美國佛羅里達州發生一宗車禍，國家運輸安全委員會日前裁定涉事汽車公司嘅無人駕駛系統，要對事件負責，建議該公司召回相關車輛。
呢個故事話畀大家聽，人工智能點樣先進精密都好，始終冇可能做到「路上零意外」，更何況係血肉之軀，特別係班搵食司機，少啲狀態，架車分分鐘淪為大殺傷力武器。呢嗱，好似最近城巴嗰單奪命車禍，原來涉事司機已經連續幾日踩超過十三粒鐘，咁搞法鐵人都冧。你知喇，巴士上百幾名乘客身家性命全部託付喺司機大佬手上，加埋香港路窄人多，車長烏眉瞌睡唔講得笑o架！
上述道理三歲細路都明，唯獨高薪厚祿嘅港產官僚懵吓懵吓，問你死未。根據運輸署指引，車長每日工作時間唔可以超過十四小時，照咁計今次涉事車長又真係唔算違規。喺勞工界爭取標準工時嘅今天，呢啲指引唔單止不人道，直頭係攞司機、乘客同埋行人嘅生命較飛。有人形容運輸署指引將人指向黃泉路，一啲都冇誇張。
好嘞，家陣搞出人命，官老爺例牌第一時間撲出嚟補鑊。運輸署助理署長聲稱會盡快檢視巴士司機工作、休息以及用膳時間嘅指引，再諮詢工會同巴士公司喎。講真，投訴巴士車長工時過長，已經唔係今時今日嘅事，舊年工會進行過調查，發現逾九成七車長每周需要超時工作，其中百分之五每周工作達六十小時以上，近半人甚至承認駕駛期間有睡意。可惜吖，對於工會呼籲將最高工時由十四小時降至十二小時，當局關人個關，結果咪搞成今日咁囉！
咁就難怪港產官僚成日畀人話唔死人冧樓唔做嘢嘞。巴士公司人手緊絀，除咗反映喺車長超長工時，仲試過有車長請病假，點知公司醫生批藥唔批假，惟有焗住「藥駕」。老規矩喇，各界要求部門正視問題，官老爺又係當耳邊風，結果真係有司機食住藥帶病返工，架車剷上行人路車死人。呢啲咪官不殺伯仁，伯仁因官而死囉！
講番車長工時過長問題，如果官老爺以為大筆一揮收緊指引就萬事大吉，未免太傻太天真。有頭髮冇人想做瘌痢，好似涉事車長咁，都係因為底薪太低，先迫不得已加班加點幫補生計嘅啫。針對有關問題，官老爺又係打住「自由市場」嘅官腔，一味叫勞資雙方自行協商，仲有冇再卸膊啲吖。
始終都係嗰句，針唔拮到肉唔知痛。運輸署官僚匿埋冷氣房，不食人間煙火咁，點識職業司機嗰種辛苦，點理解乜嘢叫人命關天吖！