政情：八網難逃：競逐廠商會會長 吳宏斌染黑髮拍片拉票
香港中華廠商聯合會現任會長李秀恒嘅任期將喺年尾屆滿，嚟緊十二月會選出新一屆廠商會會長，有意競逐會長嘅人選已逐漸浮上面，包括盛傳出選嘅副會長吳宏斌（Dennis）同徐炳光等。雙方除各自喺十月初選會董前開始落力拉票外，吳宏斌更表現積極，將白髮染埋黑，仲拍攝埋宣傳短片放上網添！
平日頭髮顏色略偏灰白嘅Dennis，喺早前新拍攝嘅短片中頭髮「立即變黑」，以新形象亮相，成個後生晒。片中可見Dennis企喺廠商會會址前作簡介，仲話廠商會係大家庭添！
成班高層上鏡力撐
成條短片唔係得Dennis一個人講晒，片中仲出現副會長楊志雄、前副會長顏吳餘英同一班年輕常務會董及會董力撐，好似常董盧金榮、蔡志婷、李慧芬同會董查毅超及陳家偉，一齊上鏡，夠晒撐佢喇！