政情：首日返工 蘇偉文有問必答
運輸及房屋局負責嘅範疇既多且廣，有市民極為關心嘅房屋政策，亦涉及海陸空交通等範疇，運房局局長陳帆上任近三個月終於有副手分擔工作，新任運房局副局長蘇偉文尋日首日返工，隨即面對傳媒「考牌試」，由港人首次置業上車盤，到最近深水埗城巴車禍，蘇偉文對此都有問必答，似乎乜都搭到嘴。
話有信心做出成果
蘇偉文擔任房委會嘅公職十年，加入政府預料要就房屋範疇出謀獻策。佢尋日會見傳媒時話，香港面對唔少問題，運房局涉及「住」及「行」兩個範疇，工作有好多挑戰，有信心喺局長領導下完成指標及為香港做出成果。被問及有指首置上車盤定價可能高於居屋，蘇偉文話施政報告會提出具體建議，當局之後會審視及制訂政策。
對於深水埗城巴車禍引發外界關注巴士車長工時問題，蘇偉文話署理特首張建宗已提出檢視有關問題，運輸署有機制處理車長每日行車時間。