政情：港島補選 建制拒抬轎 新民黨白做

搞黨內初選增士氣 料陳家珮出戰

青年新政游蕙禎同梁頌恆嘅議席早喺舊年已懸空，所以建制派有足夠時間商討補選人選，分別係民建聯（民記）鄭泳舜同工聯會鄧家彪填補游梁空缺，兩人近月已動作多多，戰意甚高。而隨住港島區喺七月份出現議席空缺，新民黨主席葉劉淑儀就講明，兩大建制政黨喺另外兩區都有人選，港島區預畀新民黨都好合理，而現時就盛傳該黨南區區議員陳家珮（Judy）好大機會代表建制派出戰。

不過，新民黨內部早就擔憂出現欽點或空降，因為立法會議員容海恩喺參選前半年先入黨，窒礙黨內年輕黨員上位機會，更影響到內部士氣，而新民黨喺今年更經歷身兼區議員及立法會議員嘅前副主席田北辰退黨，令該黨喺新界西失去一名雙料議員同另外六名區議員，而該黨新界西區議員所得嘅地區支援亦大受影響，想更上一層樓挑戰立法會就難上加難。有見及此，新民黨藉住港島區補選設立初選機制，將出選資格開放畀所有黨友報名，畀黨員一個角逐上位嘅機會，亦可以增加競爭，相信回應到黨內年輕黨員嘅聲音。

怕選票「有借冇還」 陳學鋒參選搶票

雖然新民黨進行內部改革，但都追唔上政治嘅變化，事關現時民記有意派出該黨秘書長、中西區區議會副主席陳學鋒參選，可能係擔心葉劉下屆會再參加立法會選舉，而Judy經補選提高知名度後亦一同參選，導致選票會一借冇回頭，影響自身選情。有建制派人士更以○七年立法會港島區補選作例，指葉劉當時以超過十三萬票落敗，但○八年同一六年選舉中仍拎到六萬幾票，證明選票確係一借冇回頭。睇嚟新民黨進行改革，但黨員所得嘅參選機會未必增加，分分鐘白忙一場喎。