中環出更：黃之鋒獄中學打乒乓波摺被
「雙學三子」香港眾志秘書長黃之鋒、主席羅冠聰及學聯前秘書長周永康，因喺三年前佔領行動中衝擊政府總部東翼前地，早前被法庭改判入獄六至八個月。黃之鋒喺壁屋懲教所服刑超過一個月，佢爸爸黃偉明尋日透露黃之鋒嘅獄中生活，笑稱黃之鋒以往「眼、手、腳唔協調」，依家喺獄中學會打乒乓球，又透露黃之鋒學緊做家務、摺被等一啲過往唔會做嘅嘢。
黃父話兒子適應監倉生活
黃偉明係性傾向條例家校關注組召集人，佢尋日就平機會前總主任束健銘追討約滿酬金一案出庭作供，並提及佢同束健銘一齊出席涉事嘅教會活動。黃偉明喺休庭期間向傳媒提及兒子黃之鋒在囚嘅近況，又指黃之鋒已適應獄中生活，情況幾好，亦收到好多市民嘅信件。
黃之鋒喺獄中修讀圖像設計，希望出獄後可以幫手做文宣，而立法會議員朱凱廸早前探監後，亦透露黃之鋒正申請保釋，希望可以趕及出席十月一日嘅反威權遊行，同埋盡早部署重奪羅冠聰喺立法會港島區嘅直選議席。
卓妮