中環出更：麥瑞琼為狗狗唔環遊世界
香港零售管理協會前主席「零售一姐」麥瑞琼（Caroline）退休就快一年，早前卓妮喺一個活動上見到佢神采飛揚，唔知係咪因為退休生活好多姿多采呢？Caroline就話佢啱啱由日本福岡返港，但就未有計劃環遊世界，點解？佢話因為唔捨得擺低屋企狗狗咁耐喎！
香港女工商及專業人員聯會（女工商專聯）早前選出並公布三年一度嘅「傑出專業女性及女企業家選舉」得獎者，Caroline都有出席活動，講起退休生活，佢話每次去旅行，家中狗狗都會趴喺行李箱前面睇住佢哋執行李，個樣楚楚可憐又唔開心，每次佢返屋企嘅時候，愛犬更加係未入門口已非常興奮咁迎接佢，搞到佢每次出門雖然會拜託家傭陪愛犬，但都真係唔忍心去太耐囉！
韓淑儀口快講錯名畀老友笑
講番呢日活動，女工商專聯理事韓淑儀喺介紹獎項詳情時，唔小心口快快講錯時間同嘉賓名稱，本來就冇乜嘢嘅，但就畀旁邊一班反應敏捷轉數神速嘅老友攞嚟開玩笑，笑佢去完冰島公幹返嚟，腦都實埋，Caroline仲乘機自薦叫韓淑儀請佢幫手做兼職，話寫英文完全冇問題，又夠勤力喎。不過，佢就絕對唔會出山做番全職工作，話好享受退休生活喎。
同場仲有創會會長黃汝璞、會長麥黃小珍、前會長管胡金愛同理事蔡美碧。管胡金愛非常關注女性職場安全，話有組織之前設計咗個手機應用程式「一點終1am」畀女士夜歸時傍身防狼；本身係社企民間高峰會籌委會主席嘅蔡美碧就話，得獎者除咗要事業成績斐然外，仲要熱心參與社會事務。
卓妮