七月十四啱啱過咗冇耐啫，竟然又有冤鬼回魂，邊個死唔斷氣？之唔係「千古罪人」彭定康囉。係呀，肥彭呢件過氣政客又回魂嘞，家陣搵食艱難，佢老哥唔將「末代港督」呢個朵消費到爛，又點賣多兩本書，賺多兩個養老錢吖。
來港掘金都係其次，最惡頂係佢借機又對香港事務說三道四，廢話多多，連日來唔係話律政司覆核「雙學三子」刑期係政治決定，就係指點特首要團結社會，仲話香港人爭取民主唔係反中央喎，總之乜都關佢事。呢，尋日佢老哥出席一個午餐會，可能意猶未盡啩，除咗話港獨問題可以討論，仲學人批評北京，話中國經濟實力咁強，點解軟實力咁弱，國際間冇乜朋友喎，呢啲咪叫狗口長不出象牙囉。
講到朋友咯喎，特朗普上任未夠一年，打咗七次電話畀習大大，再過個零月又要嚟中國拜訪，咁英國嘅文翠姍大媽又收過幾個Call呢？早排北京舉辦「一帶一路」高峰論壇，更加係萬邦來朝，高朋滿座，場面有幾墟冚大家睇得好清楚，反觀英國脫歐搞自我孤立，先至係孤家寡人冇朋友。
不過又難怪肥彭咁牙擦嘅，事關每次來港，一班洋奴漢奸實會空群而出，好似民主阿婆同李漢奸咁，前主子一到埗啫，即刻又攬又錫，噓寒問暖，癡癡呆呆，坐埋一枱，肥彭錯覺自己深受歡迎又真係唔出奇。
睇吓肥彭指點江山個款，佢老哥似乎忘記自己冇做港督已經二十年。有人講得啱，前排特首選舉好彩肥彭前跟班鬍鬚曾落選咋，如果唔係，肥彭實當正自己係香港太上皇都似！
正所謂，來說是非者，就係是非人。英國管治香港一百五十年，香港幾時有過民主吖？幾時有過普選吖？全部都係港督一個說了算，至於肥彭，有名你叫「千古罪人」，任內大搞「三違反」，拆毀「直通車」，簡直罪孽深重。講到尾，香港回歸後之所以日日家嘈屋閉，社會撕裂，原因就係英國撤退前留低大量爛攤子，埋下太多地雷，搞到特區政府內有無間道作梗，外有洋奴漢奸作怪，而所有亂象背後，都係鬼影幢幢，肥彭每次嚟香港，咁啱都係香江政治敏感時刻，你估真係淨係賣書及同一班奴才敍舊吹水咁簡單咩。
但點都好，今時唔同往日嘞，中國國力如日中天，英國就日薄西山，早就唔係當年嘅日不落帝國喇。再講吖，肥彭年紀一大把，身體又唔好，一把老骨頭飛來飛去都好辛苦啫，不如趁收尾幾年積番啲陰德，留喺英倫安老好過喇。