政情：掃走「堅離地」 積金局推潮語卡
強積金呢個議題一向畀人嘅印象係「唔講你唔知，講咗都未必明」。為咗掃走呢個「堅離地」嘅形象，積金局搵插畫師製作咗十二款潮語卡，例如「娘娘收兵」同「又要威又要戴頭盔」等，希望「貼地」啲介紹畀市民了解，尤其係班年輕人。積金局主席黃友嘉話，雖然潮語卡唔係佢嘅主意，但最緊要係市民「十卜」（支持），畀市民可以更加容易接收揀強積金嘅正確知識。
幽默抵死公仔造型配合
積金局之前搵插畫師Hello Wong製作咗十二款潮語卡，每張卡都係以幽默抵死嘅公仔造型配以潮語，再喺卡嘅底部貼出選擇強積金嘅正確方法同態度。例如「這些機會就是屬於我」，即係話唔係人人有機會同男神女神約會，但每人都有機會揀自己嘅強積金，最緊要把握機會；又或者「娘娘收兵」，就係娘娘廣收觀音兵其實同分散投資嘅原理有異曲同工之妙，市民投資強積金就好似娘娘一樣，唔係全部揀死一樣，要有唔同組合例如股票、債券咁。
有興趣嘅市民，可以喺Facebook專頁《全積特攻》，留意有乜嘢潮語卡，或者留言畀佢哋，等積金局知道市民有乜嘢意見？