政情：王敏剛戥個孫辛苦 「報小學難過考大學」
為咗幫小朋友報讀一間好學校，唔少家長都相當緊張。中華總商會永遠榮譽會長王敏剛有三個孫，其中五歲嗰位小朋友，原來都預備要報讀小學嘞，佢話小朋友嘅父母都打算報多幾間先，佢聽到就覺得，依家報小學，仲難過以前考大學呀！
試過帶孫仔孫女去短途旅行
王敏剛話啲孫嘅父母全部都對教育好上心，暑假都幫佢哋報咗唔少暑期班，上下晝都要上堂，自己雖然作為長輩，但都覺得要尊重番孫仔孫女嘅父母，所以都冇叫仔女不如幫小朋友報少啲暑期班，畀番佢哋決定。
咁啱啱過咗嘅暑假有冇出外玩吓？佢話小朋友暑假忙，佢自己亦都忙，所以今年暑假就冇一齊去旅行啦，不過以前都試過帶埋啲孫仔孫女去短途旅行嘅，但佢哋最大嗰個都係得七歲，去長途旅行嘅話就真係搞唔掂嘞！
睇王敏剛講得咁開心，相信一定好想全家人再去多次旅行嘞！