中環出更：臂肌粗壯如昔 李小鵬全靠湊仔
久未露面嘅「體操王子」李小鵬尋日出席慈善活動，見佢退役多年仍然保持住運動員嘅身形，尤其係手臂同胸肌仲非常粗壯，唔通仲有繼續玩雙槓？現時育有一仔一女嘅佢就話，手瓜起(月展)應該同抱小朋友有關喇！
「健康快車」尋日介紹十一月舉行嘅慈善跑籌款活動，邀請咗李小鵬同「跳水公主」郭晶晶兩位國寶級運動員出任大使，而健康快車創會主席方黃吉雯、清水灣鄉村俱樂部副主席王桂壎等人都有份出席。
小鵬啱啱喺舊年砌夠「好」字，五歲嘅大女已接觸唔少運動項目，好似跑步、游水、跳舞，連騎馬都學埋，唔通想發掘佢最擅長嘅運動加以培訓？小鵬就話只係想囡囡享受同體驗運動嘅樂趣，唔一定要只專注一個項目咁話。
晶晶話囝囝好識氹爺爺
而晶晶亦喺今年為丈夫、港協暨奧委會副會長霍啟剛增添一女，同樣砌夠「好」字。佢話囡囡中妍太細個而未摸索到佢嘅性格，但囝囝中曦就非常活躍。另外，晶晶又透露老爺霍震霆有時間就會探孫，而中曦更好識氹爺爺，會對住爺爺講「I Love You（我愛你）」，相信爺爺聽到都冧晒喇！
王桂壎過往都有參加健康快車嘅慈善跑，但就話由長跑變做長行，近年更變到短行添！佢解釋，因為肚腩愈嚟愈大，加上近年都有唔少做運動樂極生悲嘅事件，就更加覺得要量力而為嘞。
方黃吉雯：每日行一萬步
至於方黃吉雯就自爆甚少做運動，但為健康着想，就訂立咗每日要行一萬步嘅目標。至於飲食方面，佢都盡量清淡，減少食煎炸食物，不過中秋節將至，直言鍾意食月餅嘅佢都有所放肆，所以有時會以月餅作正餐，避免過度進食。
卓妮