政情：公民講場：紙皮垃圾爆煲 張建宗「緊急」處理

內地造紙廠未能進口本港嘅廢紙，令本港回收出口商積壓廢紙嘅問題已被揭發多日，日前業界終於發起停收廢紙，令問題進一步爆煲，尋日街頭更不時見到紙皮垃圾堆積，蔚為奇觀。政府對此態度一直懶懶閒，眼見火燒後欄，署理行政長官張建宗先至話正與內地當局「緊急」磋商，希望可以妥善處理問題，搵出解決方法。事件拖咗咁耐，唔急都被政府拖到急，真係佛都有火。