中環出更：慈善跳繩賽 張德熙重拾兒時玩意
香港跳繩代表隊尋日參加一項慈善跳繩活動，並挑戰兩項世界紀錄。有跳繩高手獻技又能做善事，難怪吸引唔少名人參與，包括主辦機構金銀業貿易場慈善基金主席張德熙。佢話跳繩適合地少人多嘅香港人玩，佢細個都有跳繩，但已經多年無跳喇！
尋日為「跳出未來」慈善跳繩接力挑戰日，活動會將過百萬元善款捐畀東華三院旗下精神復康服務計劃及教育服務，中國香港跳繩總會亦同樣受惠。東華三院主席李鋈麟、副主席蔡榮星及馬清揚等董事局成員都有到場支持。
馬清揚每星期都跳
講起跳繩，張德熙大讚跳繩能夠強心，而且佔用空間唔多，適合香港人玩。佢細個都有跳繩，但係當年嘅繩好輕，好難玩。當年佢仲有玩橡筋繩，至今仍記得邊玩邊唱嘅童謠添。馬清揚都鍾意跳繩，到依家都仲維持每星期都跳嘅好習慣，唔知呢個係咪佢身形高大嘅關鍵呢？
李鋈麟細個都有玩吓跳繩，依家就做其他運動，即係每日三次喺原地急跑，呢個習慣已經維持超過一年，由起初一分鐘到今日可以跑到三分鐘。佢解釋，要透過呢個動作向大腦發放燃燒脂肪嘅訊息，所以自己食量大都唔怕肥喇。蔡榮星都認同要常運動，但工作太忙，所以佢平日多數會以行路代替搭車，當係運動咁話。
講番尋日活動，一眾港隊成員喺十分鐘內接力打出一百四十五個空翻，成功打破大繩前空翻嘅世界紀錄，不過另一項三十秒交換繩速度跳紀錄就未被打破。
卓妮