政情：北上做臨時兼任教授 吳得掂撈番老本行
過去多年頻頻外訪，畀人諷刺為「外遊局長」嘅教育局前局長吳克儉（吳得掂），離開政府唔夠三個月就有新工作，原來下一站係北望神州。前任行政長官及政治委任官員離職後工作諮詢委員會（委員會）公布，吳得掂由今日開始出任上海大學MBA中心嘅臨時兼任教授，期間主要負責為一個四日課程準備課程大綱及教材，並會教授有關內容及評估學生表現。
期間唔可以透露政府機密
其實吳得掂今次出任臨時兼任教授，某程度上係做番老本行，事關佢出任局長前曾做過浸會大學客席教授、又做過上海大學工商管理碩士學院名譽教授。委員會同意關於吳得掂嘅聘任，唔會引起外界合理地擔心吳得掂延取報酬或利益，委員會又提及，吳得掂於工作期間唔應該使用，或向任何人傳達或透露任何機密或敏感資料。
另外，環境局前副局長陸恭蕙今日起會更新佢喺七年前出版嘅書籍。委員會認為，陸恭蕙喺更新及修訂書本內容時，唔可以透露同環境局副局長相關而又有可能令政府尷尬嘅內容。