政情：白鴿內訌林卓廷揾援兵狙擊區鎮樺

安排「黑仔王」莊榮輝等人加盟新東

據了解，原屬於港島支部、喺區議會選舉連輸四屆嘅「黑仔王」莊榮輝，以及今屆喺中西區堅摩選區參選嘅冼卓嵐等三人，近日喺林卓廷支持下加盟新界東支部。雖然「轉會」程序仍然進行中，但莊榮輝已經急不及待搬入大圍區，而冼卓嵐嘅橫額亦喺大埔區出現。有分析就話，由於大埔同沙田區議會係前綫地盤，林卓廷咁做係要安排自己人插入該區，若果未來成功當選區議員，就可以溝淡前綫地區勢力。

除咗安排自己人「轉會」過檔新界東支部，兩派喺爭奪白鴿黨內地區資源嘅問題上都有拉鋸。

兩派都有意競逐補選 爭黨內資源

眾所周知，與林卓廷同屬北區區議員嘅陳旭明，同區鎮樺都有報名黨內白鴿黨嘅政治領袖計劃，有意競逐新界東補選，而參與計劃嘅兩人可以獲得黨內提供額外資源作宣傳。但最新消息係，同區鎮樺分屬老友嘅副主席李永成，同埋尚未轉會嘅莊榮輝都有報名，形成二對二嘅局面。

不過，有白鴿中人就認為，即使林卓廷同地區勢力有矛盾，但由於佢喺議會上表現比較亮眼，地區勢力似乎「郁佢唔到」。莊榮輝接受查詢時就否認為咗幫兄弟而轉支部，強調自己一向同新界東議員林卓廷、新界西議員尹兆堅喺反圍標議題上有較多合作，所以考慮轉支部時都有諗過新界東或新界西，後來評估過新界東有較多反圍標嘅個案，所以決定落戶新東。佢又話，去到邊都係為白鴿黨做嘢，唔需要陰謀論咁諗。至於林卓廷就話黨內無分黨派，相信黨友轉支部係經過深思熟慮喎。