中環出更：美魔女妙答年齡秘密生肖屬孔雀
美容科技愈嚟愈進步，唔少凍齡美魔女嘅真實年齡，真係點都睇唔出。香江文化交流基金會主席江素惠都係保養得宜之人，早前喺佢創辦嘅香江論壇成立十五周年晚宴上，江素惠自爆多年嚟不停畀人問佢幾多歲、生肖屬乜。被問得多，佢索性話自己生肖屬孔雀，因為夠晒貪靚咁解，真係搞笑。
江素惠曾任台灣新聞局駐港機構光華新聞文化中心主任，好多兩岸三地嘅人都識佢，但係多年來佢個樣一直冇乜點變，難怪個個對佢嘅年齡都感到好奇喇！
劉木蘭樂見學生台灣尋夢
當晚座上客仲有台北經濟文化辦事處處長嚴重光、台灣大專院校香港校友會聯合總會副會長劉木蘭等人。嚴重光話，近年好多香港學生到台灣升讀大學，現時讀緊嘅就有八千幾人，台北經濟文化辦事處最近舉辦一場就業徵才會，為留台畢業生返港搵工出力，結果好多香港台資企業都鬥搶人才添！
本身係香港人嘅劉木蘭喺七十年代到台灣讀書，多年來一直喺香港做義工幫手招生。佢有感而發話，台灣嘅大學包容性高，佢見過一名患有精神分裂症嘅港生到台灣讀美術系，學校對佢特別照顧，仲會帶佢睇醫生，呢位同學用咗六年時間，今年即將升讀四年級。親眼見到好多學生喺台灣搵到人生夢想，難怪佢愈做愈上心。
同場仲有著名歷史學家潘邦正，佢依家喺珠海學院亞洲研究中心任職。潘邦正話香港研究水準都算高，但係歷史檔案資料收藏唔夠，認為政府、大學同民間應共同努力，做得更好。
卓妮