港獨歪風吹遍大學校園，唔少大學生開口埋口「獨立自決」，又話「自己香港自己救」。講得咁口響，不如問吓呢班大帝，內地早前宣布禁止廢物進口，香港即刻連廢紙都無人接收，就快廢紙圍城，可以點解決吖？
唔係講笑，自從內地公布年底開始禁止二十四類固體廢物進口後，本港回收業就叫苦連天，事關係人都知港府嘅回收政策天殘地缺，再生廢料喺香港冇乜出路，只能轉口海外，當中大部分就係運返內地處理。隨着內地環保意識提高，再唔係乜嘢垃圾都收，呢種「以鄰為壑」嘅不道德交易終於有玩完嘅一日，問你點算。
嗱，好似本港嘅回收廢紙業咁吖，因為內地遲遲未批出第四季入口批文，搞到回收商隨時關門執笠，唔閉翳就假。港府話就話必要時可撥出屯門環保園空地存放廢紙，但都係治標不治本嘅咋，業界決定今日起停收廢紙，務求迫使港府加緊同內地溝通。業界話喎，家陣已有回收商堆積咗三、四千噸廢紙未能出口，以現時每日全港廢紙回收量達二千五百噸計算，唔使幾耐就會廢紙圍城，唔止拾荒長者收入頓失，仲遲早塞爆堆填區添。
面對回收商呢一波罷收行動，港府好似仲未知驚，環境局局長黃錦星下巴輕輕，話今次係業界轉型嘅大好機會，回收基金已預留二千萬元予業界申請購買機器，提升回收產品質素以符合內地法規喎。講就容易咯，莫講話二千萬元只係微不足道嘅小數目，最大問題係業界轉型唔係一時三刻搞得掂，呢段時間嘅廢紙點處理呢？何況內地唔止禁收廢紙，塑膠廢料、紡織廢料以至電子垃圾都拒收，最弊香港人均垃圾量全球第一，電子產品人均擁有量又係全球第一，一旦廢料無法出口，點止廢紙圍城咁簡單，直情變做垃圾港都似。
睇到喇，香港連自己廢紙自己都解決唔到，又點樣自己香港自己救呢？點樣香港獨立呢？都仲未計內地供水供電供食物呢一筆。所以話啫，做人就算唔飲水思源，都要有自知之明，香港地少人稠，乜嘢天然資源都冇，幾乎樣樣嘢都要倚賴內地供應，呢啲係改變唔到嘅事實。年輕人被無良政客洗腦，一味為反而反，動輒鑽牛角尖，其實同自掘墳墓冇乜分別嘅咋。
講番回收問題吖，正所謂己所不欲，勿施於人，一味將垃圾塞畀內地根本唔係正路，港府除咗有責任向內地反映今次事件，盡快平息風波，更有責任做好本地回收配套，而治本之法就係市民減少製造垃圾，咪做大嘥鬼喇。