政情：莫嘉嫻落區 白鴿黨喪Like
民協前主席莫嘉嫻喺今年中退出民協，有傳民主黨（白鴿黨）有意尋求佢「過檔」，但一直只聞樓梯聲響。莫嘉嫻日前喺Facebook上載於土瓜灣馬頭圍一帶落區嘅相片，並留言見到唔少老友，都問及其最新動態，但佢冇即時「開估」，僅稱「遲啲話你知」。
莫嘉嫻今次「復出」落區，有佢頭像嘅旗幡暫未見白鴿黨嘅標誌，據了解白鴿黨九龍西支部亦暫未收到莫嘉嫻入黨申請，但一批白鴿黨中人已提早向佢大派like，包括三名立法會議員黃碧雲、尹兆堅同許智峯，屯門區議員陳樹英等，而早前退出民協後轉會白鴿黨嘅九龍城區議員蕭亮聲，亦有like埋一份，惹來政圈聯想莫加入白鴿黨係咪「好事近」？
派綠色單張 疑為黨標主色
此外，與莫嘉嫻同樣出身九西嘅黃碧雲，除咗派like外，更留言「加油」，似乎好有力撐莫嘉嫻嘅味道；有眼利嘅網民更留言話見到莫嘉嫻落區派嘅單張係綠色，咁啱綠色係白鴿黨標誌嘅主色，究竟一切係刻意抑或巧合安排呢？