政情：反「一地兩檢」借尿遁阿忠又做逃兵

舊年立法會首次會議選舉主席，由於當時最資深嘅議員有份參與競逐，於是作為第二資深議員嘅阿忠就出任代主席主持選舉，但佢竟然喺會議中途以無法有效主持為由，主動放棄主持會議，令到會議改由建制派掌控大局，事件令阿忠變成逃兵，連泛民支持者都狠插。

投票唔見影 動議遭否決

而喺尋日嘅葵青區議會會議上，阿忠和議由街工周偉雄同民主黨許祺祥提出，要求撤回高鐵「一地兩檢」方案，以及就通關安排進行公眾諮詢嘅動議。阿忠喺會上明言反對「一地兩檢」，又批評現有方案令香港對部分土地失去管治權同執法權，強調係非常差嘅做法。佢又提到近期推銷「一地兩檢」嘅手法係「講好多大話」，直指係誤導市民同「講啲唔講啲」。

之不過，阿忠發言後就喺會議室消失咗，仲喺宣布點票結果時先現身，當時佢嘅表情仲尷尷尬尬咁。議案最終以七票贊成、十六票反對、一票棄權遭到否決。其實泛民都自知弱勢，只係博有冇得偷雞，好彩阿忠唔係關鍵一票，否則肯定畀人鬧爆。

自稱「唔係講笑」「忍咗好耐」

點解失蹤？佢事後解釋話冇諗過咁快進入表決階段，直言「無理由咁快」，又話唔知道會無人發言，重申佢係趁發言完畢先去洗手間。「借尿遁」呢個講法的確搞笑，可能阿忠都知講出嚟無人信，所以都強調自己「唔係講笑」，更多次重申自己「忍咗好耐」。

阿忠仲話黨友黃潤達有打電話畀佢提醒返去投票，但因為仲喺洗手間而冇辦法趕到，並唔係唔想投票咁話。確實喺投票時見到黃潤達打住電話舉手，但可惜為時已晚嘞！

其實喺阿忠發言後，仲有五名議員緊接其後發言，理應有足夠時間去完洗手間返嚟繼續會議，而且喺嗰五名議員當中，有兩個建制派議員同一個獨立議員，如果其他泛民都積極發言，相信可以「等埋阿忠」嘅！