中環出更：郭晶晶收完身仲想生
全港最大型的慈善跑又開始接受報名喇！主辦機構聯合國兒童基金會香港委員會尋日特登喺修頓球場舉行慈善跑啟動禮，基金會主席陳晴（Judy）同大使郭晶晶等城中名人都有出席。郭晶晶生完第二胎之後罕有公開現身，望落已收身，佢笑言自己仲有啲肥，比起生完第一胎仲難減喎。被問到有冇計劃再生？佢話：「少少想，仔女冇所謂，已經有一仔一女，老公都冇所謂。」
晶晶透露亦想帶同三歲大仔霍中曦一齊參加慈善跑，佢話發覺兒子喜愛跑步，但唔鍾意游泳，細女霍中妍現時五個月大，佢話囡囡仲未識同哥哥玩耍，問到囡囡個樣係咪好似嫲嫲（朱玲玲）？晶晶話唔知道，囡囡仲細，每一日都唔同，改變緊。
陳晴唔想囝囝曝光
其實Judy嘅囝囝已經六歲，唔知佢想唔想追多個呢？佢笑笑口話，個仔都有催促佢，話想要細佬或妹妹，不過呢啲要睇天意嘞！佢話生兒育女責任好大，驚自己唔夠時間湊。佢又話個仔年年都有參加慈善跑，只不過佢唔想個仔曝光啫，所以變成佢身後的男人囉！
同場仲有基金會籌募委員會主席方文雄、食物及衞生局副局長徐德義、世界女子桌球冠軍吳安儀等人，前世界單車冠軍黃金寶都帶埋兩歲囝囝一齊去支持。黃金寶話做運動員經常要爭先，但有一個人佢永遠要企喺後邊，就係個仔喇，事關小朋友永遠都需要扶持。
徐德義唔鍾意跑步
喺背後默默支持仔女嘅仲有方文雄，佢話兩個仔依家已各自創業，希望佢哋唔使返來公司幫手，因為咁樣代表佢哋創業成功，至於家族企業就由佢自己頂住先喇！
雖然潮流興長跑，但本身係醫生嘅徐德義就唔鍾意跑步，平時多數都喺屋企踩踏板機，若果有時間出外做運動，就寧願行路，因為冇咁傷膝頭喎。
卓妮