政情：獄中倒貼$3贖信 黃浩銘肉赤
在囚嘅社民連黃浩銘早前喺Facebook提醒寄信畀佢嘅朋友，必須貼上足夠郵資，否則要扣佢自己嘅人工，而社運人士葉寶琳亦喺Fb話由於郵資不足，義工需要到郵局贖信，但似乎冇人聽佢哋支笛，黃浩銘尋日又喺Fb貼文，話因郵資不足而需補貼，佢已經被扣咗三蚊人工。獄中人工低，收信愈多，分分鐘扣晒佢份糧，等於白做，佢梗係肉赤喇！
服刑一個月 精神唔錯
黃浩銘因反東北發展計劃被加刑判囚十三個月，依家喺赤柱服刑近一個月。佢尋日喺Fb貼文，由佢親友轉達嘅訊息，除咗透露剪咗一個新髮型同精神唔錯外，仲話臉頰好似瘦削咗啲啲。
講講下，佢又提及收咗一大疊各方好友嘅信，但佢再次提醒大家要貼夠郵費，因為佢過去一個星期喺工作薪酬中扣咗三蚊郵費，所以佢希望大家謹記貼上足夠郵費嘅郵票。
當初係佢呼籲外界寫多啲信畀佢解悶，而喺服刑初期又埋怨一封信都冇收到，依家收到信就因郵資不足而被扣人工，呢次可謂「捉蟲」。