政情：戴耀廷 踩過界 澳門版雷動得啖笑
建制派立法會議員何君堯早前喺網上收集到超過八萬個簽名，要求香港大學將鼓吹學生「違法達義」、策動違法佔中嘅法律系副教授戴耀廷炒魷，但戴耀廷仍未知衰，近日又喺報章撰文，倡議澳門選民喺嚟緊嘅澳門立法會選舉推行「雷動計劃」，希望協助當地嘅民主自由開放陣營取得最多議席，真係亂完港又亂澳。不過，呢個舉動除咗可能違反當地選舉法例，仲隨時會弄巧反拙，令整個澳門非建制陣營一鋪清袋，由少數派輸到連一席都冇。
戴耀廷喺舊年香港立法會選舉時推出「雷動計劃」，企圖透過指示民主派支持者策略性配票，幫非建制陣營贏得最多議席。但計劃初時被指親疏有別、亂點鴛鴦，到落實執行時更出現訊息混亂同過度配票嘅問題，間接累死咗個別民主派元老，喺部分選區反令建制派得益。
倡選民分散票源投民主派
不過，向來自我感覺良好嘅戴耀廷，事後仍堅稱「雷動計劃」成功，近日更推出「澳門版雷動」。佢喺眾多澳門立法會直選名單之中，篩選出七張聲稱支持「真普選」嘅名單，並教導澳門選民每七個人組成一組，各投一票畀嗰七張名單，希望喺比例代表制下，協助當地嘅民主派同自由開放派取得七席。佢又話經過澳門風災，相信今屆選舉嘅投票率會大增，如果該七張非建制名單合共取得過半數選票，就形同一次澳門選民要求真普選嘅公投喎。
翻查過往多屆嘅澳門立法會換屆選舉，非建制派喺直選中最多只取得約三成選票，上屆更跌至約兩成半。其中主流民主派「新澳門學社」，更因過分進取分開多張名單參選，喺票源分散下，最終議席數目不增反減，由之前嘅三席變為兩席。有個別堅持唔分名單嘅建制派，反而透過集中票源，一張名單連取三席。
若「成功」 或害非建制零議席
以上屆嘅兩成半得票做假設，平分七份就每張名單約百分之三點六得票，而呢次選舉嘅當選門檻係要大約百分之四得票，即係一旦戴耀廷嘅「澳門版雷動」得以完美落實，非建制陣營隨時會一席都攞唔到！難怪澳門現任民主派議員區錦新接受訪問時，就直斥戴耀廷唔熟悉澳門情況，形容整個「澳門版雷動」係「得啖笑」！