中環出更：尹兆堅去英國食中菜貪平
距離立法會復會只剩番一個月時間，所以唔少議員早已經外遊完畢，叉足晒電回港，收拾心情投入工作。不過，立法會議員尹兆堅（肥尹）近日仲喺Facebook上分享歐遊相片，唔通佢玩到樂而忘返，想最後衝刺？
喚起青葱歲月回憶
其實肥尹近日係去咗歐洲考察房屋政策同做比較，仲喺網上話完全唔係講玩講放假，所以唔好錯怪佢。佢又提到今次行程緊湊，只會留喺英國三晚，即使難得抽身離開香港，都只有一個晚上同上午時間周圍打卡喎。不過，齋睇相都知佢善用時間，因為佢用有限時間去咗唔少著名景點，例如維修緊嘅大笨鐘、摩天輪倫敦眼同唐人街等。
而講到最難忘最感動，佢竟然話去無服務、價錢平、分量足嘅中菜館用膳喎，成功引起唔少網友留言，有人就話嗰間餐廳超難食，亦有人話伙記態度惡劣。不過，肥尹就話伙記態度好咗好多，因為老一輩伙記已經退休，後繼無人咁話，但以當地標準嚟講仍然屬於無服務喎。雖然無服務可言，但佢就話勾起青葱歲月嘅回憶，仲要係咁多代留學英國學生嘅集體回憶添！
卓妮