中環出更：培養仔女興趣 霍啟剛唔強迫
今時今日嘅學生，十八般武藝乜都要識，運動音樂興趣班同補習加加埋埋，一星期上足十幾堂。卓妮早前喺香港青年聯會第二十五屆會慶及會董會就職典禮上見到前主席霍啟剛，佢話都有安排小朋友接觸佢哋有興趣嘅事物，但唔會強迫佢哋學。咁佢有冇問過小朋友係咪真係鍾意先？佢就話試咗先知，所以會先畀佢哋去嘗試，然後再睇吓鍾唔鍾意喎，佢仲話覺得仔女愈大愈活躍添！
講起香港學生讀書壓力大，早前有調查指每兩個中學生就有一個受抑鬱困擾，當中超過一萬人更患有達臨床級別嘅嚴重抑鬱，霍啟剛話明白依家學生競爭激烈，又諗起以前細個成日被要求學游水，但好彩佢好動，自己又鍾意，所以冇覺得好大壓力。
蔡德昇做運動開心減壓
呢日青聯就職，城中名人雲集，粒粒皆星。前常務副主席郭永亮今屆升任新主席，蔡德昇亦「升呢」成為常務副主席，其餘出席猛人仲有信和置業執行董事黃永光、新地執行董事郭基煇同觀瀾湖集團副主席朱鼎耀等，都係今屆青聯副主席。
除咗霍啟剛，原來好多青聯成員一樣熱愛運動，好似常務副財務長林顥伊咁，就係香港女子冰球代表隊成員！朱鼎耀都唔輸蝕，以前讀書有四項運動都係校隊嚟o架，包括籃球同足球，難怪佢身形咁大隻喇。
蔡德昇同朱鼎耀仲笑言，細個放學會極速做晒啲功課，咁先可以出去玩，而每次做完運動都特別開心，有減壓作用。
郭永亮就話今年除咗係青聯二十五周年，仲同時係佢哋舉辦「共創系列」暑期實習團嘅十周年，過去十年佢哋為三千幾個學生提供實習機會，提升學生競爭力。
卓妮