政情：遊瑞士電話卡失靈 葉建源樂得清淨
唔少政界中人趁暑假去旅行抖抖氣，教育界立法會議員葉建源早前亦同太太一齊去瑞士度假，但佢竟然去去吓旅行，同香港辦事處嘅同事失聯，到底發生乜事呢？
與香港同事失聯
葉建源就話，今次係跟團去旅行，自己習慣去旅行時都會上網留意住香港嘅情況，所以出發前已經預先買定上網電話卡。點知張卡喺中途失靈，上唔到網，結果佢咪同香港嘅同事失聯囉！好彩當地嘅酒店同埋部分公共空間可以無線上網，如果唔係，佢就全程都睇唔到香港新聞喇！不過葉建源就笑笑口話，電話卡失靈，反而令佢呢次旅程耳根夠晒清淨喎。
葉建源之前已去過瑞士幾次，佢話幾鍾意呢個地方，但之前都係去公幹，今年先有機會去度假。瑞士畀人嘅印象係周圍都鋪滿積雪，但葉建源就話，瑞士除咗山頂有雪之外，其實好多地方都幾熱，連當地居民平時都只係着短袖衫咋！