政情：十項公職難兼顧郭振華主動「減磅」
香港工業總會主席郭振華（Jimmy）自從前年卸任深水埗區議會主席之後，獲政府委任多項公職，儼如新一代工業界公職王。日前喺一個活動見到Jimmy，佢話依家有十項公職在身，最近佢已主動辭去「BUD專項基金委員會」委員同埋「職業訓練局專業教育培訓顧問委員會」主席，希望逐步將公職減磅。
將減剩七項
Jimmy話雖然政府冇明文規定唔可以同時擔任超過六項公職，但係佢都主動減磅，以免兼顧唔到。其中BUD專項基金委員會委員將由工總副主席葉中賢接任，至於職訓局專業教育培訓顧問委員會主席就會由政府另外委任。除咗呢兩項之外，Jimmy出任理工大學校董會校董一職即將到期，屆時佢十項公職將減至七項。
佢又話有啲公職係工總主席嘅當然席位，所以減極有限。依家佢除咗出任勞工顧問委員會委員、香港貿易發展局理事等要職之外，今個月初又獲委任被視為今屆政府施政重點之一嘅工業貿易諮詢委員會委員，都幾吃重o架！