政情：港島補選周庭倘拒披甲姚松炎勢空降
因應六個議員被取消資格而進行嘅補選勢在必行，雖然社民連梁國雄（長毛）同劉小麗尋日開記者會表明上訴，但九龍西、新界東、港島區同建築界仍然各有一個議席需要進行補選。據聞，民主派就港島區補選已經有初步討論，喺港島選區將全面讓路畀香港眾志黨員或佢哋推薦嘅人出選。眾志方面暫時有兩個方案，一係游說較有知名度嘅香港眾志常委周庭出選；一係由同樣被取消資格嘅前建築界議員姚松炎「空降」港島，以代替原本計劃參加補選嘅香港眾志黃之鋒同羅冠聰。
青年新政游蕙禎同梁頌恆去年被褫奪立法會議員資格後，羅冠聰、長毛、姚松炎及劉小麗亦相繼被取消議員資格，導致九龍西、新界東、港島及功能組別建築界選區共有六個議席需要補選。由於游蕙禎同梁頌恆嘅終極上訴被拒，若同屬九龍西選區嘅劉小麗同新界東嘅長毛不提上訴，兩席將會合併補選，到時喺比例代表制下，建制派好大機會取得一席。
為咗阻止建制派得逞，民主派尋日召開記者會，宣布長毛及劉小麗均會就其政府嘅司法覆核提出上訴，並會喺下星期一將上訴狀交畀司法機構。長毛話，已經就上訴獲得法援，而因為訟費而頭痕嘅劉小麗，就獲民主派四個版塊，即民主黨、公民黨、專業議政同獨立民主派議員各捐款四十萬元資助，再加上守護公義基金二百八十多萬元嘅資助，上訴經費應該不成問題。至於羅冠聰、姚松炎就好大機會唔會上訴。
民主派有共識讓路畀眾志
上訴一事終於敲定，下一步就係討論補選問題。據聞民主派喺九龍西同新界東仍然未成功協調人選，反而港島區嘅情況就較為明朗。早前傳過，民主派本身屬意港島區由羅冠聰本人或者黃之鋒參與補選，但兩人因衝入政府東翼前地案件被判監超過三個月，五年之內唔可以參選，搞到此路突然不通。據了解，民主派有共識喺港島區仍然會全面讓路畀眾志，「蜀中無大將」嘅眾志，依家要睇周庭願唔願意親自披甲，如果佢唔去，就會由姚松炎代表出選喇！